жәндіктерге жатқызатын, өсімдік пен жануарлардың туыстығына дәлел бола алатын біржасушалы
жәндік -жасыл эвглена. Жасуша цитоплазмасының сыртқы шет аймағы тығыздау болып өте жұқа жарғақша қабат түзеді. Осы жарғақша қабат цитоплазманың қалған сұйықтау ішкі бөлігін қоршап, оның жан-жаққа жайылып кетуіне мүмкіндік бермейтін қабық ролін атқарады. Осыған байланысты жануар денесінің пішіні өзгермей, тұрақты болады. Дененің артқы сүйірлеу жағында ядро жатады, ал алдыңғы доғал жағындағы ойыс -жұтқыншақтан цитоплазманың жіңішке созындысы - талшық шығып тұрады. Эвглена жасушасының цитоплазмасында хлоропластар бар. Ал хлоропластарда жасыл пигмент-хлорофилл болады. Сондықтан жарықта жануардың түсі жасыл болады; оның жасыл эвглена атануы осыдан.
Жасушасында хлоропластар бар қарапайым жануарлардың бірі –вольвокс. Вольвокстар шағын тұщы су қоймаларында көбірек кездеседі. Жасыл эвгленадан ерекшелігі вольвокстің әрбір дарағы жеке емес шоғыр болып тіршілік етуге бейімделген. Мысалы, вольвокстің бір түрінің шоғырында 500-1000 жасушаға дейін болады. Әр жасуша қабығының кілегейленуінен қою іркілдек зат түзіліп, шоғырдың сыртын орайды. Мұның ең сыртқы қабаты тығыз тері қабатына айналып, шоғырдың ыдырамай берік болуын қамтамасыз етеді. Ал ішкі -орталық бөлігі онша тығыз емес, қоймалжың күйде болады. Жеке жасушалар сыртқы тері қабаты мен орталық сұйық бөліктің арасын бір -бірімен өте жіңішке цитоплазмалық көпіршелер арқылы байланысады. Шоғырдың пішіні шар тәрізді болады. Шоғырдағы әр жасушаның құрылысы жасыл эвгленаның құрылысымен ұқсас, ерекшелігі әрқайсысында екіден талшық болады. Бұл талшықтар шоғырдан сыртқа шығып тұрады.
