Ковылкинскяй райононь Керата мокшень велеса. Тонафнесь васенда эсь велень школаса,
сяда меле Саранскяй педтехникумса (1931). 1939-це кизоня заочна аделазе Мокшэрзянь педагогическяй институтть.Нинге 1934-це кизоня примафоль СССР-нь Писателень союзу. Литераторонь творчествац ушедовсь «Од веле» Зубово-Полянскяй районнай газетаса сотрудникокс улемстонза. Мзярда Мордовияса ушетфоль профессиональнай Писателень союзть пуроптомац, Бебан сувафтфоль сонь оргкомитетозонза (1934-1935) и кочкафоль «Колхозонь эряф» мокшекс лисенди васенце журналти ответственнай секретарькс (1935-1937). Великай Отечественнай войнада инголе кафта кизот савсь тейнза работамс школьнай учителькс.
Войнань сембе ниле кизотнень Максим Афанасьевич ульсь фронтса, а войнада меле тертьфоль литсотрудникокс «Мокшень правда» газетав. 1947-1948-це кизотнень ульсь ответственнай секретарькс Мордовиянь Писателень союзса, а сяда меле путфоль директоркс Мокшэрзянь книжнай издательствав.